“Арсенал”-ын дасгалжуулагч Арсен Венгер ирэх зуны наймааны үеэр шинэ тоглогч авахад 20 сая евро зарцуулах төлөвлөгөөтэй байна. Ингэхдээ хашир, туршлагатай тоглогч авах бодолтой байгаа гэнэ. “Бид 1-2 тоглогч авахаар төлөвлөж байгаа нь үнэн. Харин энэ тоглогчид маань туршлагатай хүн байх болно.

Одоо манай багт авьяаслаг залуус хангалттай байна” хэмээн франц мэргэжилтэн ярьжээ. Тэдний анхаарлыг хамгийн их татаж байгаа хүн нь “Ливеруль”-ийн хагас хамгаалагч Хави Алонсо аж. Мөн лондончууд довтлогч Адебайорыг “Милан”-д зарж магадгүй байна.

“МЮ”-ын аргентин довтлогч Карлос Тевес энэ улирлын төгсгөлд багаа орхих бодолтой байгаагаа ярьжээ. “Надад их харамсалтай байна. Би уг нь ирэх улиралд “Юнайтед”-д үлдэхийн тулд бүх хүчээ дайчлан тоглож байгаа. Гэвч багийн удирдлагууд одоо болтол шинэ гэрээ санал болгоогүй нь миний тэвчээрийг барж байна. Хөгжөөн дэмжигчид намайг үлдэхийг хүсч байгаа. Би тэдний төлөө баярлаж байгаагаа хэлье. “МЮ”-ын балиашгууд үргэлж миний зүрх сэтгэлд орших болно. Байдал энэ хэвээрээ үргэлжилвэл би “МЮ”-ыг орхих байх. Гэхдээ хаашаа очихоо сайн мэдэхгүй байна. Надад Англид байх таалагддаг. Премьер лиг бол дэлхийн шилдэг лиг. Английн хөлбөмбөгийн арга барил надад тохирдог юм” хэмээн Карлитос өгүүлжээ.

Германы “Вердер” багийн бразил легионер Диего ирэх зунаас Турины “Ювентус”-т тоглохоор боллоо. Хоёр тал лхагвагаас пүрэв гаригт шилжих шөнө тохиролцоонд хүрсэн гэнэ. Эх сурвалжийн мэдээлснээр италичууд Диегогийн төлөө 23 сая евро төлж байгаа аж. Тэрбээр Турины багтай дөрвөн жилийн гэрээ байгуулсан бөгөөд жилд 3.8 сая евро авах юм байна.