Added (2009-04-03, 10:37 Pm)
---------------------------------------------
Гадаадынхны шүлсийг гоо­жуулсаар байгаа Оюу тол­гой, Таван толгой зэрэг ордыг эзэн­тэй болгох алтан боломж Ерөнхий сайд С.Баярт нээг­дэж байна. Ингэх бүрэн эр­хийг нь УИХ олголоо.

Энэ зурвас үеийг ашиглан тэдгээр хараал шингэсэн ордуудыг даруйхан сонирхоод байгаа хүмүүст нь өгөх хэрэгтэй. Яагаад гэвэл одоо таны ажлыг эсэргүүцэн тэмцэлдэх хэн ч байхгүй. Сөрөг хүчний намаа элдэв дэмий юм яриад байх­гүй болгосон. Элдэв юм хэлж ард олны толгойг эргүүлдэг иргэний хөдөлгөөнүүд байх­гүйтэй адил болсон. Хамгийн сүүлд Г.Баасан авгай баригд­лаа. Одоо хөгшин хүн хэдий­хэн тэмцэлдэж чадах аж. Ард түмний эсэргүүцэл бүрэн дарагдлаа. Өнгөрдөг зуны "АК-47" ярьж хоносон шөнөөс хойш таны эсрэг хэн ч үг хэлж чадахаа байсан гэдгийг эрх­биш гадарлаж байгаа биз ээ. Энүүхэн хугацаанд сайд минь Монголын ард түмэнд ганцхан ч гэсэн хэрэгтэй зүйл хийж өгнө үү. Хоёр толгойг зориг­тойгоор эзэнд нь өг.

Эзгүй хээр элсэн доор сул хэвтэж байгаа тэр их мөнгө­ний сургаар Монгол Улсын тусгаар тогтнол, ардчилал устаж үгүй болох нь байна. Эдгээр ордыг тэр хүсээд байгаа Канад, Солонгос, Орос, Хятадын хэн нь ч авсан байсан маньд хамаа алга. Энэ их баялгийг ямар ч байсан монголчууд эзэмших хувьгүй бололтой. Хэнд ч өгч чадах­гүй хав дараад баян тарган, баялаг ихтэй гэж сайрхаад суугаад байвал ардчилал гээд гайхуулдаг зүйл минь алга болох нь. Тэгвэл ардчи­лал бол тусгаар тогтнолын баталгаа. Тусгаар тогтнолын баталгаа байхгүй болчихоор энэ төр гэдэг чинь байхгүй болох юм биш үү. Төргүй болохоор Монгол Улс гэж байх уу. Ядуу ч гэсэн Монгол Улстайгаа, ядарсан ч гэсэн төртэйгээ байсан нь дээр. Монголын хувьд бол хаана ч байж л байдаг наад хоёр толгойноос чинь хурдхан л хагацах минь. Яагаад ингэж хэлээд байна вэ гэвэл га­даадынхан сүүлийн үед бид­ний тусгаар тогтнол, ардчи­л­лаас илүүтэйгээр наад баял­гийг чинь яаж зүгээр эзэмш­чих вэ хэмээн толгой­гоо гашилгаж байгаа болол­той. Дэлхий нийтийг одоо­хондоо зөвхөн мөнгө л удир­даж бай­на. Яваандаа бурхан­лаг оюун санаа удирдах биз ээ. Тэр хүртэл монголчууд бид энэ дэлхийгээс арчигдах­даа ту­лах нь шиг байна. Үүний баталгаа ч сүүлийн үед илүү мэдрэгдэх боллоо. Бид­ний явуулсан УИХ-ын сонгуу­лийг эргээд санацгаая. Тэнд энэ хоёр толгойг одоогийн хүсээд байгаа гадны хүмүүст өгөх гэсэн нам, арай өөрөөр эзэм­ших гэсэн нам гэсэн хоёр л субъект сонгуульд өрсөлд­сөн. Үүнд МАХН одоо­гийн эзэмших гээд байгаа гадны­ханд өгөхөөр тохироо яриагаа явуулаад эхэлчих­сэн, ха­хууль зээлээ авчихсан бай­сан. Нэг ёсондоо хуйвал­даа­ны журмаар далд тохироо­гоор хийж эхэлсэн байв.

Ха­рин Ард­чилсан нам үүнийг шал өөр маягаар эзэмшихээр төлөвлөж байлаа. Тэд дэл­хийн уул уурхайг ашиглах стан­дартыг мөрдүүлэх юм бодож санасан. Ил тод уул уурхай гэдгийг л ярьж байлаа. Тэгээд сонгууль явагдаж дууслаа. Хүн үнэмшмээргүй том луйвар явагдаж МАХН ялалт байгуулав. Үүнийг нь эсэргүүцсэн ард түмэн жаг­саал цуглаан хийж санал бодлоо илэрхийлсэн. Гэтэл ямар нэгэн зохион байгуу­лалтай хүчин түүнийг нь үймээн болгон хувиргаж онц байдал тогтоох хүртэл байд­лыг хурцатгасан. Албан ёсны тоогоор таван хүн буудуулан нас барж, мянга шахуу хүн баривчлагдан саатуулагдаж, 200 гаруй хүн шоронд явлаа. Халуун зэвсгийн суманд шар­хадсан хүний тоо хэд ч байгаа юм мэдэгдэхгүй бай­на. Мөн албан бус тоогоор дал шахуу хүн буудуулж нас барсан мэдээ ч байдаг. Ийм аймшиг­тай үйл явдал болж өнгөрлөө. Монгол Улсын түү­хэнд 1932 оны хувьсгалын эсэргүү тэмц­лийг дарах гэж төр нь ард түмнийхээ эсрэг зэвсэг хэрэглэж арми хөдөл­гөснөөс хойш жаран зургаан жилийн дараа 2008 оны дол­дугаар сарын 1-ний шөнө мөн арми хөдөлгөлөө. Ийнхүү үзэл суртлын төлөө манай арми хоёронтоо ард түмнийхээ эсрэг хөдөлсөн юм. Ард­чилсан Монгол Улсын түү­хэнд ийм хар өдөр болж түү­нээс хойш ардчилал алхам алхмаар хумигдаж байна. Гэтэл энэ бүхнийг дэлхий нийт огт үл тоож өнгөрүүлэв. Их сайндаа л "Америкийн гар хөл болсон хэсэг бусаг хү­мүүс өнгөт хувьсгал гарга­хаар санаархав" гэж мэдээ­лэгдээд дууслаа. Тэгвэл Түв­дийн хэрэг явдлыг дэлхий нийт яаж хүлээж авсан билээ. Дэлхий нийт тэр чигтээ өмөө­рөн босч байсан. Биднийг яагаад үл тоов. Нөгөө хоёр толгойг эзэмшихээр өчнөөн төчнөөн мөнгө хөрөнгө гарга­сан хүмүүс бүхнийг мэдэж байна. Тэдний нөлөөнд ямар нэг байдлаар орчихсон гадаа­даас манайд байгаа хэвлэл мэдээллийнхэн "Сонгууль нь шударга, луйваргүй явагдлаа" хэмээн дэлхийгээр нэг цацаж байна. Ардчилал нь ялбал бидэнд баялгаа өгөхгүй тул ашиггүй хэмээн өөр өөрийн улсууддаа ойлгуулчихаж бай­на. Манайхаас гарч байгаа мэдээлэл болгон ямар нэгэн байдлаар гуйвж наад хоёр толгойн эрх ашигт очиж хол­богдоод байна. Харин бидний тэргүүний эрх ашиг болсон тусгаар тогтнол, ардчилалд энэ нь хор болсоор удлаа. Тиймээс С.Баяр Ерөнхий сайд аа зоригтойгоор, хугацаа алдалгүйгээр наад хоёр тол­гойгоо эзэнтэй болгоо. Эзэн­тэй юмыг хүн булаа­цалд­даггүй юм. Хойч үе чинь эрхбиш энэ талаас нь ойлгох байлгүй. Тэгэхгүй бол том гүрнүүдийн геополитикт хэр­чүүлээд дуу­сах нь.
Ж.Сандагдорж